Aredak

Standard

Aredak

Umuna nga arbis, kas bayakabak.

Inauna amin a panangbisibis

Barat’ barukong ti ili nga iti naliday a kannag

Ket maminribu a mapasag

Santo kadagiti unget, iti pammati

Kas iti panagayat, ket ti panagungar

Nga iti lisay ket ti soltero a tig-ab.

Daytoy ket iti ili: aredak kadagiti

Di manumeruan a kalgaw

Wenno panagbisin. Wenno panaggawat

Tapno kadagiti inurit ket ti namnama

Nga iti rubuat dagiti mula a maitukit

Ket ti manigsiguro a panaganani iti ragsak.

Siglo dagiti tawen, kas ti lamiis

Daytoy umuna a tudo kadagiti rebelde a sellang

Tapno ditoy, kadagiti alikuno ti danum-langit

Ket ti selula ti revolusion nga iti riwriw

A panagidaton iti agmatuon

Ket ti riwriw met a panagaklon.

 

Febrero 16, 2012/

Honolulu 

Daldallot, Part 1, Olelo Production Feb 2012

Standard

DALLOT TI PANANGAS-ASAW

 

 

TATA RIZAL

 

A ta dallot duminididallang

Ragsak ni dallot dalidallang

 

Ket kastoy koma kakabsat

Innak maisawang

Palubosandakam koma

A mangidalan

 

A ta palubosandakam

Koma a mangisawang

Daytoy a rantami a gagara

 

Daytoy a rantami a gagara

Tapno inkam koma

Maibuksilan

 

Tapno inkam koma

Maibuksilan

Ta iti kasta ket malawlawagan

 

Tapno kasta ket malawlawagan

Kayatmi ita a maidalan

 

Kayatmi ita a maidalan

Tapno ti kawitanmi ket

Ket mabaudan

 

Tapno kawitanmi ket

Mabaudan

Ta iti kasta ket agtalnan!

 

A ta dallot duminidallang

Ragsak ni dallot dalidallang!

 

NANA FELY

 

A ta dallot duminidallang

Ragsak ni dallot dalidallang

 

 

 

Palubosandak koma met

Papagayam sumarita

A makisawang

 

Sumarita a makisawang

Tapno rikna maidalan

 

Tapno rikna maidalan

Kadagitoy a kapasamakan

 

Kadagitoy a kapasamakan

Ken panagdaton iti balasang

 

Ket panagdaton iti balasang

Daytoy ibaudyo a kawitan

 

Daytoy ibaudyo a kawitan

Ta kunayo nga agtalnan

 

Ta kunayo nga agtalnan

Panangbukelnat’ familian!

 

Panangbukelnat’ familian

Ngem a ta anian a gapunan!

 

Ngem ta anian a gapunan

Ta ti sabongmi ket busel pay

 

Ta ti sabongmi ket busel pay

Uggot iti bigat nasugpet pay

 

A ta dallat duminidallang

Ragsak ni dallot dalidallang!

 

TATA RIZAL

 

A ta dallot duminidallang

Ragsak ni dallot dalidallang

 

Nangngeganmi kakabsat insawang

Natimudmi met patigmaan

 

Natimudmi met patigmaan

Iti gandat uggormi a kawitan

 

Iti gandat uggormi a kawitan

Tapno koma agtalnan

 

A ta asi pay daytoy a kawitan

No di met maruk-atan

 

No di met daytoy maruk-atan

Agkibor barukong, paggurigoran

 

Agkibor barukong, paggurigoran

Gapu iti ayat iti balasang

 

Gaput iti ayat iti balasang

Ngarud denggenyo koma itan

Ngarud denggenyo koma ita

Nasudi nga ararawmi itan

 

Nasudi nga ararawmi itan

Panangidaton iti balasang

 

Panangidaton iti balasang

Nasudi nga ayat awan mulitnan

 

Nasudi nga ayat awan mulitnan

Panangilala di mainsasaan

 

Panangilala di mainsasaan

Panangipateg pagrukbaban

 

Panangipateg pagrukbaban

Iti sabongyo a kapintasan

 

A ta dallot duminidallang

Ragsak ni dallot dalidallang

 

NANA FELY

 

A ta dallot duminidallang

Ragsak ni dallot dalidallang

 

Nangngeganmi atanud

Inaklonmi balikas a sagut

 

Inaklonmi balikas a sagut

Ngem dikam pay ita sipapalubos

 

Ngem dikam pay ita sipapalubos

Panagsimpa ti sabong nga uggot!

 

A ta dallot duminidallang

Ragsak ni dallot dalidallang

 

TATA RIZAL

 

A ta dallot duminidallang

Ragsak ni dallot dalidallang

 

No ti sabong ket iti agsapa

Umisem iti raya ti daya

 

Umisem iti raya ti daya

Ket init singisinganna

 

Ket ti init singisinganna

Ti linnaaw ti sampaga

 

Ti linnaaw ti sampaga

Anian a lapsat ti agsapa!

 

Anian a lapsat ti agsapa!

Ta kastoy, kabsat ti pammateg

 

Agukrad tapno agimutektek

Agimulat’ ayat iti dam-eg

 

Agimulat ayat iti dam-ag

Tapno agrusing pammateg!

 

A ta dallot duminidallang

Ragsak ni dallot dalidallang

 

 

 

 

NANA FELY

 

A ta dallot duminidallang

Ragsak ni dallot dalidallang

 

Kastoy ti inkam ita makunan

Kastoy koma ti saritaan

 

Kastoy koma ti saritaan

Dikam pay ita sisasagana!

 

Dikam pay ita sisasagana

Nga umawat iti kawitan!

 

A ta dallot duminidallang

Ragsak ni dallot dalidallang

 

TATA RIZAL

 

A ta dallot duminidallang

Ragsak ni dallot dalidallang

 

Umaykam koma dumawat

Panangngaasi iti ayat

 

Panangngaasi iti ayat

Tapno inkam maparaburan

 

Tapno inkam maparaburan

Dungngo a pakaisalakanan

 

Dungngo a pakaisalakanan

Pangrugian pakasubbotan

 

 

Pangrugian pakasubbotan

Ayat a daton ni malmaldaang

 

Ayat a daton ni malmaldaang

Ti manokmi a kawitan

 

Ti manokmi a kawitan

Iti agsapa agtaraok itan!

 

Iti agsapa agtaraok itan!

Birokenna ti sabongnan!

 

Birokenna ti sabongna!

Umok ni ayat a pagdatonan!

 

Umok ni ayat a pagdatonan

Ipaidulinna iti balasang

 

A ta dallot duminidallang

Ragsak ni dallot dalidallang

 

NANA FELY

 

A ta dallot duminidallang

Ragsak ni dallot dalidallang

 

Awan, kabsat, inkam makunan

No di damagen iti balasang

 

No di damagen iti balasang

No aniat’ kapanunotan

 

No aniat’ kapanunotan

Daton nga ayat ti kawitan!

 

 

Daldallot, Part 2/ Olelo Production Feb 2012

Standard

DALLOT (PART 2)

OLELO PRODUCTION

FEBRUARY 12, 2011

 

 

TATA RIZAL

 

A ta dallot duminidallang

Ragsak ni dallot dalidallang

 

Bay-andak koma a sumungbat

Kakabsatko ita papagayam

 

Kakabsatko ida papagayam

Iti daytoy a tallaong itan

 

Iti daytoy a tallaong itan

Tapno mangted panangidalan

 

Tapno mangted panangidalan

Iti nalawag a saritaan

 

A ta dallot duminidallang

Ragsak ni dallot dalidallang

 

NANA FELY

 

A ta dallot duminidallang

Ragsak ni dallot dalidallang

 

Sika nga albasiador agunika

Sumungbatka koma kas rebbengna

 

Sumungbatka koma kas rebbengna

Tapno saritaan nalawagda

 

Tapno saritaan nalawagda

Kas kalawag init iti agsapa

 

Kas kalawag init iti agsapa

Mangsirsiray aramidtay ita

 

Mangsirsiray aramidtay ita

Bay-antay a sumarita ti kabsat

 

Bay-antay a sumarita ti kabsat

Albasiador a pagayam ni ayat

 

Albasiador a pagayam ni ayat

Kabinnulig aramid a nasayaat

 

Kabinnulig aramid a nasayaat

Toy kabsat a maingel ken ayat

 

Toy kabsat a maingel ken ayat

Albasiadar ragsak ni ragsak!

 

A ta dallot duminidallang

Ragsak ni dallot dalidallang

 

TATA RIZAL

 

A ta dallot duminidallang

Ragsak ni dallot dalidallang

 

Siak man koma ti mangisawang

Mangiyarasaas ti pakaigapuan

 

Mangiyarasaas ti pakaigapuan

Iyuumaymi iti daytoy saklang!

 

A ta dallot duminidallang

Ragsak ni dallot dalidallang

 

NANA FELY

 

A ta dallot duminidallang

Ragsak ni dallot dalidallang

 

Dakayo a lalakian

Bay-antayo ti albasiador itan

 

Bay-antayo ti albasiador itan

Mangwaswas iti saritaan

 

Mangwaswas iti saritaan

Tapno makita pakaigasatan

 

Tapno makita pakaigasatan

Daytoy a tungtongan!

 

A ta dallot duminidallang

Ragsak ni dallot dalidallang

 

ALBASIADOR/ TATA RIZAL

 

A ta dallot duminidallang

Ragsak ni dallot dalidallang

 

Siak man kakabsat sumarita

Mangisawang gandat lalakian

 

Mangisawang gandat lalakian

Mangibuksil ungtot’ saritaan

 

 

Ta daytoy lalakian a kawitan

Umokna birokennan!

 

Umukna birokennan!

Ket daytoy di mainsasaanan!

 

Ket daytoy di mainsasaanan!

Ta daytoy linteg ti biag.

 

Ta daytoy linteg ti biag

Panagbirok kasimpungalan

 

Panagbirok kasimpungalan

Tapno ti aldaw ket agrayray

 

Tapno ti aldaw ket agrayray

Ket marikna ti darang ti bigat

 

Ket marikna ti darang ti biag

Kas met ti rabii a nagasat!

 

Kas met ti rabii a nagasat

Tapno iti kasta ket agragsak!

 

A ta dallot duminidallang

Ragsak ni dallot dalidallang

 

NANA FELY

 

A ta dallot duminidallang

Ragsak ni dallot dalidallang

 

Dumngegkami a babaian

Agsaganat’ saritaan

 

Agsaganat saritaan

Tapno inkam maidalan

 

Tapno inkam maidalan

Naimbag a panungpalan

 

Naimbag a panungpalan

Pagragsakan ti sangapada

 

Pagsagrakan ti sangapada

Agraman sabong a tagikukua

 

Agraman sabong a tagikukua

Tapno iti agsapa ket agukrad

 

Tapno iti agsapa ket agukrad

Mangnanam iti rayray ti bigat

 

A ta dallot duminidallang

Ragsak ni dallot dalidallang

 

TATA RIZAL

 

A ta dallot duminidallang

Ragsak ni dallot dalidallang

 

A ta adda kadi panagtukiad

Babaian iti daytoy a kalat

 

Babian iti daytoy a kalat

Iti daytoy a daton ni ayat?

 

Iti daytoy a daton ni ayat

Manipud baromi ingget ragsak?

 

Baromi nga ingget ragsak

Mangidaton pudno nga ayat

 

Mangidaton pudno nga ayat

Mangidaton iti bukod a biag

 

Mangidaton bukod a biag

Isagut ken sabong a nagasat

 

Isagut ken sabong a nagasat

Mangikut iti puso ken kararua

 

Mangikut iti puso ken kararua

Kadagiti amin nga aldawda

 

Kadagiti amin nga aldawda

Iti kawitanmi iti sabongyo

 

Ti kawitanmi iti sabongyo

Iti amin a kanito ti ragragsak

 

A ta dallot duminidallang

Ragsak ni dallot dalidallang

 

NANA FELY

 

A ta dallot duminidallang

Ragsak ni dallot dalidallang

 

Ti pusomi ket silulukat

Sindadaan saritaan a nasayaat

 

A ta dallot duminidallang

Ragsak ni dallot dalidallang

 

TATA RIZAL

 

A ta dallot duminidallang

Ragsak ni dallot dalidallang

 

Kastoy koma ti inkam makuna

Kakabsatmi ida, papagayam

 

Kakabsatmi ida, papagayam

Kadua ita itoy a tallaong

 

Kadua ita itoy a tallaong

Saksi daytoy nga ayan-ayat

 

Saksi daytoy nga ayan-ayat

Panagkammayet aginnayan-ayat

 

Panagkammayet aginnayan-ayat

Panagmaymaysa dua a kararua

 

Panagmaymaysa dua a kararua

Dua a puso a nagasat

 

A ta dallot duminidallang

Ragsak ni dallot dalidallang