ilokano writers. pedro bukaneg

Standard

Adda manen 2nd nga silulukat nga surat ni Ric Agnes nga inwarasna!

 

Ngem imbes koma nga nalawagen ti amin, ad-adda met nga mangulaw ken mangkalub iti kinapudno! Ad-ada met nga mang-ballaibo ken mangilupek iti GUMIL!

 

Alawen, adda met kinapudno kadagiti ital-talanggutangna ngem selective met ti policy na, kaluban na dagiti gagayyem ken kakadua na ket kugta-kugtaran na dagiti kabus-busor na nga padana nga mannurat!

 

Isu nga adtoy met nga adda 2nd nga komentaryok.

 

Ulit-uliten ni Agnes nga dak-dakamaten dayta artikulo ni Amado Yoro nga iat-atached na iti emailna a natakuatanen a dinoktorna (Agnes) tapno agparang a ni Bermudez, ken Valdez, ti akinbasol wenno rebbeng a mapabasol iti imbutaktak na nga anomalya iti Bucaneg Awards idi 2007 ken 2008.

 

Kuna ni Agnes:

 

“(B) Saan a nasayaat ti proseso ti panagpipili idi 2008 agsipud ta dua a lawas sakbay a maserraan ti nominasion, addan napili ti selection committee a maikkan iti award.  Ni Precillano Bermudez ti Chairman iti daydi a tawen.  (Naisapit ti artikulo ni Apo Amado Yoro a nangilanadanna kadagiti sursurat kas naagapad iti ngato.)

 

(c) Rumbeng a saan nga agakem ni Precillano Bermudez a kameng ti komite agsipud ta nalawag nga adda pabpaboranna kadagiti mainominar.  (Mapaneknekan daytoy babaen ti suratna (email) ken ni Apo Amado Yoro itay napalabas a tawen.)”

 

Pudno a saan a nasayaat ti proseso ti panagpipili idi 2008  ta dua a lawas sakbay a maserraan ti nominasion, addan napili ti selection committee a maikkan iti award. Apay?

 

Apay nga agpayso? Iti naisapit nga artikulo ni Yoro (saan a mabasa ti nakin-statement iti daytoy ta in-erased ni Agnes, blinanko na ti na-scanned nga article ni Yoro): “Siak ti nangisingasing a maklosanen ti nominasion iti PBA agsipud ta adda metten ni Francis Ponce. Kayatda met isu a ni Apo Francis ti PEDRO BUCANEG AWARDEE ita a tawen.’

 

Apay sinno kadi ti nangibaga iti dayta? Sinno isu nga naginlalaing nga nang-closed iti nominasyon?

 

Daytoy ti kompleto nga paragraph iti orihinal nga article ni Yoro: “Siak ti nangisingasing a maklosanen ti nominasion iti PBA agsipud ta adda metten ni Francis Ponce. Kayatda met isu a ni Apo Francis ti PEDRO BUCANEG AWARDEE ita a tawen.’ Inyemail met ni Elizabeth Madarang Raquel, bise presidente ti Gumil Filipinas.

 

Aha! Ni gayam Elizabeth Madarang Raquel, bise presidente ti Gumil Filipinas!

 

Ngem apay a kasta ti inaramid ni Agnes? Apay nga inikkatna ti nagan ni Raquel iti article?

 

Tapno agparang a dayta nga statement ket katuloy ti statement ni Precillano Bermudez iti article! Ni Precillano Bermudez kano ti chairman ti selection committee idi nga tawen.

 

Iti article ni Yoro kastoy laeng ti imbaga ni Bermudez: “Napintas a personal a maipadamagko: ni Kabsat Francis ‘Sabong ti Biag’ Ponce, ti kandidatok para iti PEDRO BUCANEG AWARD 2008” , inyemail ni kamannurat Prescillano N. Bermudez, Pedro Bucaneg Awardee 1996; UMPIL 2007, opisial iti Gumil Filipinas ken TMI-G; dati a direktor iti National Media Production Center, ken Philippine Information Agency – Philippines.

 

Ngem agbalin a kastoy no itipon dayta statement ni Raquel: “Napintas a personal a maipadamagko: ni Kabsat Francis ‘Sabong ti Biag’ Ponce, ti kandidatok para iti PEDRO BUCANEG AWARD 2008” , inyemail ni kamannurat Prescillano N. Bermudez, Pedro Bucaneg Awardee 1996; UMPIL 2007, opisial iti Gumil Filipinas ken TMI-G; dati a direktor iti National Media Production Center, ken Philippine Information Agency – Philippines. “Siak ti nangisingasing a maklosanen ti nominasion iti PBA agsipud ta adda metten ni Francis Ponce. Kayatda met isu a ni Apo Francis ti PEDRO BUCANEG AWARDEE ita a tawen.’”

 

Inikkat ni Agnes ti nagan ni Raquel iti artikulu ni Yoro ngem imbatina ti statement ni Raquel tapno agparang nga tuloy dayta ti statement ni Bermudez!

 

Anyan nga panangdadael ken ni Bermudez! Anian a panangkalub ken panangilisi ken ni Elizabeth Madarang Raquel! Ngem apay?

 

Iti maikadua a surat ni Agnes, maammuantayon. Malaksid a gayyem ni Agnes ni Raquel, isuda pay gayam iti GUMIL Oahu ti nanginominar ken ni Raquel para umawat iti Leona Florentino Awards 2009!

 

Isu met la gayam a kasta la unay ti panang-protektar ni Agnes ken ni Ely Raquel!

 

Wen. Basaenyo pay ti surat ni Agnes: “Ngem awan pannakainaig ti Leona Florentino Awards agsipud ta awan pagilasinan a nasukatsukatan ti pangannurotan daytoy.  No adda man, dayta ti dakkel a liway ti GF agsipud ta dida ipakpakaammo kadagiti kamkameng dagiti baro a pagannurotan. Wenno iranrantada ti agilimed tapno maaramidda ti panagmanipulateda?”

 

Kayat nga ilisi ni Agnes ni gayyem da iti GUMIL Oahu nga Raquel ket ibaga na nga awan kano ti anomalya met ti Leona Awards! A no adda man kano pabasolen na ti GF! Ngem dina met pabasolen nga mismo ni Raquel? Kayat ni Agnes nga tiritiren ti kinapudno tapno isalakan na ni Raquel nga innominar da kas umawat met iti awards!

 

Ngem imbagan ni Rogie Baysa: “nasupusopan ti paglintegan iti Pedro Bucaneg ken Leona Florentino Awards… Ta no dimi tungpalen daytoy, saan koma met a nagun-odan ni Apo Elizabeth Madarang -Raquel nga innomenario dita Hawaii iti Leona Florentino Awards. Awan pay 60 a tawen ni Madam Ely. Ngarud, awan pay koma ti karbenganna nga umawat iti dayta a pammadayaw.”

 

Imbataden ni Baysa: nasupusopan ti paglintegan iti Pedro Bucaneg ken Leona Florentino Awards.” Ngem apay a kuna ni Agnes nga awan pagilasinan a nasukatan ti pagannurotan ti Leona Awards? Ket ti laeng Bucaneg Awards kano ti adda? Ni Baysa nga mismon ti nangibaga nga ti Bucaneg ken Leona, agpada a nasukatan dagiti pagannurotanna tapno maiyannatop iti kayat da nga maikkan iti award! Asino aya ni Baysa? Isu ti agdama nga secretary general ti GUMIL Filipinas! Ngarud ammo na amin a mapaspasamak iti GF! Adda amin kania na ti amin docomentos, amin a minutes ti meeting no adda, amin a resulutions no adda! Apay nga i-ignore ni Agnes a saan a karaman ti Leona Awards agraman pay dadduma nga awards nga itited ti GF? Maigapu ken ni Raquel nga gayyem na! Maigapu ta isu da iti GUMIL Oahu ti nagnominar ken ni Raquel! Ni Raquel a maysa no diman isu ti kangrunaan nga manipulator iti awards committee ti GF (agasem ta i-closed nan ti nominasyon idinto nga adu koma pay ti sumangpet nga nominasyon adayo pay ti deadline!)

 

Ania daytoyen a panangkalub iti kinapudno!

 

No koma ti panggep ni Agnes ket ti manglaw-lawag ken mangipalgak iti kinapudno, saan koma nga kastoy nga selective wenno adda an-anaken na! Awan serbi na dayta nga addang na wenno krusada na no kapada na met laeng dagiti inna ak-akusaran nga adda kalkaluban ken pabpaboran da!

 

Maysa pay nga makapadusngi ditoy nga 2nd open letter ni Agnes, nagkamang kano iti dua nga mannurat ket maysa ni Peter La. Julian!

 

Ania? Ni Julian nga apo-apo da iti TMI ni Teresito Tugade, lamlamiongen ni Agnes tapno alaen na ti opinion na?

 

Nakakatkatawa daytoyen! Ni Agnes ti makuna nga numero unon san nga kabusor ken detractor ti TMI! Ken numero unon sa met nga kabusor ken detractor ni Tugade (nga ibag-baga ni Agnes nga nagpamakan ken nagpa-bulalu kano tapno agawen na dagiti GUMIL members!) No malagipyo, ni Agnes adda open letter na man idin iti GUMIL ket paik-ikkat na dagiti TMI members kas kameng ti GF! Gapu dayta iti personal nga gura na ken Tugade nga pabpabasolen na nga agrek-rekrut iti downline na kano iti Xango! Ita, ania ti pamkuatan na nga mangikamang iti reklamo na ken ni Julian nga pasurot ni Tugade? Ni Julian nga ari-ari dagiti TMI iti Isabela?

 

Ti nakakatkatawa, dardaras met nga kimmagat iti appan ni Agnes daytoy nga Julian! Nagyat met nga nagpalam-lammiong! Nangted met nga sigud iti masao na nga kasla praise release wenno blurb iti libro ni Agnes! Siyempre, maawatan tayo uray ngata ilako ni Julian ti kararwa na met iti diyablo makabales la ketdi kadagiti kabusor na iti GUMIL! Napintas nga oportunidad dayta tapno mapatamaan na manen dagiti apo-apo iti agdama nga lideratu ti GUMIL!

 

Ngem ania laengen ti makuna met ni Tugade nga founder ti TMI iti inaramid ni Julian a nakikunsabo metten ken ni Agnes a #1 detractor ken destroyer ken nemesis ti TMI?

 

Ala para iti pagimbagan dayta ti GUMIL ken litiratura Iluko, irason met ngata a ni Julian! Nasayaat laeng no kasta koma laeng.

 

Ngem sakbay koma nga mangted iti makunana ni Julian, anagen na koma nga nalaing dagiti taltalanggutangen ni Agnes. Kas ita, nalawag nga inusar ni Agnes ni Julian tapno mai-advance na ti ginugulib met ngarud nga cause ken krusada na! Nga natakuatan tayon nga manipulated ken ulaw-ulaw maigapu iti selective policy na! Nagbalin nga kasla utu-utu ditoy ni Julian ta sinikbab na nga dagus ti inyayat ni Agnes nga appan na nga igges!

 

Awan lat nasayaaten kadagituy nga gum-gumil ken titi-em-ay! Puro rinuker da amin!

 

Dapat na agpenitensya dagituy nga sapliten da iti riduma ken siit dagiti labos nga bukot da! Wenno agpai-lansa da iti kurus! Tapnu maugasan ti bas-basol da!

 

Pakawanem Apo ta ammo da met ti araramiden da ngem agindidiammo da!

 

 

######

 

 

Surat kadagiti amin a maseknan:

Abril 6, 2009

 

Maipanggep daytoy iti Pedro Bucaneg Award 2009:

Idi Marso 18, 2009 sinuratak ti GUMIL Filipinas maipanggep iti:

(A)  Saan nga umno a pannakabalbaliw ti tawen ti mapadayawan iti Pedro Bucaneg Award iti kanito ti panagpipili agsipud ta nalawag a nalaga ti pagannurotan a maiyannatop iti kayat ti selection committeee ken dagiti opisiales ti GF a pangabaken.  Insingasingko nga aglalinaed a 60 wenno nangatngato ti edad ti mapadayawan.

(B)  Saan nga umno nga agakem ni Precillano Bermudez a kameng ken Chair  ti Selection Committee 2009 agsipud ta base iti napalabas a tawen, impalgakna nga adda bukodna a kandidato idi 2008 a panagpaayna met laeng kas Chair ti Selection Committee.  Gapu ta adda pabpaburanna, makuna a saan a patas ti panagpilina, ngarud, saan a rumbeng a maikkan iti kasta a takem agsipud ta gulgulibanna dagiti dadduma a nominees. 

(C)  Saan a nasayaat ti proseso ti panagpipili idi 2008 agsipud ta dua a lawas sakbay a maserraan ti nominasion, addan napili ti selection committee a maikkan iti award.  Ni Precillano Bermudez ti Chairman iti daydi a tawen.  (Naisapit ti artikulo ni Apo Amado Yoro a nangilanadanna kadagiti sursurat kas naagapad iti ngato.)

Idi Marso 25, nakaawatak iti surat ti GF babaen ken ni Rogie Baysa, Seretario Heneral ti GUMIL Filipinas.  Kastoy ti linaonna:

Apo Ric Agnes,

            No adda man nagkibaltangan ti gunglotayo iti pannakapili ti 2009 Pedro Bucaneg Awardee, siakon ti dumawat iti pannakaawatmo, kabsat.

            Napudno met ti kunak dagiti kameng ti Komite a nangarisit kadagiti naidatag a pagpilianda. Ala, no saan a naisaknap ti pannakaiwaragawag ti pannakaibaba ti tawen ti kandidato ti puntotayo, dayta ket nagkamtudan ti gunglo nga ulitek nga idawatan ti pannakaawatmo.

            Apay a naibaba? Adu ti naawardan idin ken adu ti singasing a maisubli ti 50 ti tawen ti maikkan iti Pedro Bucaneg Award ken Leona Florentino Award. Inadal ti komite dayta a singasing, naidatag iti Board of Directors ket nadiskutir ken naanamungan met.

            Apay a naingato iti 60 ti tawen idi?  Diak ammo ngem masinunuok nga adda met rasonda.

                                                                                    Toy kabsatmo iti pluma.

                                                                                (Pdo) BALDOVINO Ab. VALDEZ

                                                                                        GUMIL Filipinas President

Idi Marso 27, sinuratak manen ti GF, insingasingko a:

(a)   Rumbeng a saan a maaramat dayta baro a criteria agsipud ta nalawag a balbaliwan dagiti kameng ti komite ti Pedro Bucaneg dagiti pagalagadan tapno maisukog ken maitutop iti kalipikasion ti kayat ti komite a pakaiyawatan ti award.

 

(b)   Rumbeng a saan nga agakem ni Precillano Bermudez a kameng ti komite agsipud ta nalawag nga adda pabpaboranna kadagiti mainominar.  (Mapaneknekan daytoy babaen ti suratna (email) ken ni Apo Amado Yoro itay napalabas a tawen.)

(c)    Maisingasing ngarud a mangbukel ti GF iti baro a komite (a pakailaksidan ni Precillano Bermudez) a mamagdadasig manen kadagiti kalipikasion dagiti nainominar nga agtawen iti 60 wenno nasursurok.  Saan a rumbeng a mamanipulate ti Pedro Bucaneg Awards tapno agtalinaed ti anag ken prestihio daytoy.

Idi Marso 31, nakaawatak iti surat ni Apo Rogie Baysa.  Kastoy ti linaonna:

Kenka Apo Ric Agnes,

Nabasak ti emailmo maipapan iti kunam a saan a rumbeng a mabigbig ti baro a criteria iti pannakapili ti Perdo Bucaneg ken Leona Florentino Awards. A saan a rumbeng a maibaba iti 60 a tawen ti maikkan iti daytoy a pammadayaw.

Ladingitenmi nga ibaga kenka a dimi  mabalin a salungasingen no ania ti nagsasaritaan dagiti Board of Directors iti miting a naaramid idiay Metro Manila. Ta no dimi tungpalen daytoy, saan koma met a nagun-odan ni Apo Elizabeth Madarang -Raquel nga innomenario dita Hawaii iti Leona Florentino Awards. Awan pay 60 a tawen ni Madam Ely. Ngarud, awan pay koma ti karbenganna nga umawat iti dayta a pammadayaw. Ngem gapu ta nasupusopan ti paglintegan iti Pedro Bucaneg ken Leona Florentino Awards, naited kenkuana ti pammigbig.

Maipapan iti kunayo a saan a patas ti panirigan ni Apo Prescillano Bermudez iti panagpilina iti Pedro Bucaneg Awardee, dayta ti dimi ammo. Ngem no aramidenna man dayta, saan met siguron dagiti dua pay a kaduana iti committee on awards. Kadagupan dagiti uppat a nominado  para iti nasao a pammadayaw, nagkaykaysaanda (unanimous)  a pinili ni Apo Aurelio S. Agcaoili. 

Kastan, kabsat. Sapay koma ta daytoy ket nasungbatanna dagiti saludsodmo.

Kabsatmo iti pluma,

Rogie C. Baysa
GF Sekretario Heneral    

 

PAMMALIIW:

Iti umuna a surat ti GF, kinuna ni Baldovino Valdez (PAV) nga adda DAGDAG-BAWAS a naaramid iti edad dagiti maikkan iti award.  No ania a resulosion mainaig iti daytoy a banag, awan inagapadda.  Kasta met nga awan kopia ti minutes of the meeting.  Kaano a naaramid dagitoy, no adda man, siasinoda a nagmimiting?

Kas presidente ti gunglo, rumbeng koma nga ammo ni Baldovino Valdez ti gapu a naingato ti tawen ti maawardan.  Ngem nagulimek kadi gapu ta isu ti nagsagrap wenno nabenipisiaran dayta kellaat a pannakaingato ti tawen!

No ania ti nagkibaltangan ti gunglo iti pannakapili ti 2009 Pedro Bucaneg Awardee, no bilang adda a nakaipuon ti idadawatna iti pammakawan, saanda nga inagapad dayta kunana a nagkibaltangan ti gunglo.

Iti maikadua a surat ti GF babaen ken ni Rogie Baysa, kayatda nga iraman ti Leona Florentino Awards gapu ngata ta innominar ti GUMIL Oahu ni Mrs. Raquel.  Ngem awan pannakainaig ti Leona Florentino Awards agsipud ta awan pagilasinan a nasukatsukatan ti pangannurotan daytoy.  No adda man, dayta ti dakkel a liway ti GF agsipud ta dida ipakpakaammo kadagiti kamkameng dagiti baro a pagannurotan.   Wenno iranrantada ti agilimed tapno maaramidda ti panagmanipulateda?

No kunada a napagkaykaysaanda a pinili ni Aurelio Agcaoili, siasino koma ti mamati ket adda dita a Chairman ni Precillano Bermudez a mangtirtiritir ken mangmanmanipulate iti resulta ti nominasion?

Kalpasan dayta surat ni Rogie Baysa, saanko idan a sinungbatan agsipud ta awan maganab ti pannakisarita kadakuada, imbes, in-emailko ti silulukat a surat kadakayo tapno dakayo ti mangeddeng.

Adu ti nagsubalit a nangipeksaanda iti isusupiatda iti daytoy dakes a maar-aramid iti Pedro Bucaneg Awards.  Nagyamanak kadakuada ti panangisingayda iti orasda iti daytoy a banag. 

Adda dua a nagkiddawak iti panangipakaammok kadakayo ti kapanunotanda.  Pinilik ida agsipud ta ammok nga isuda ti maysa kadagiti nakipagbuangay iti GUMIL Filipinas ken ti nanginaw iti Pedro Bucaneg Awards, da Apo Leonardo Belen ken Apo Peter La. Julian.

Kuna ni Apo Peter La. Julian iti suratna idi Abril 3:

no dadduma, malipatan ti makuna a delikadeza dagiti organisasion. kas pagarigan, no sitting presidentka, dimo mabalin nga awaten ti pammadayaw ti bukodmo a gunglo no adda kasalipmo a sabali. no adda paratignaymo,  sika nga adda iti takem, dimo mabalin ti agmaniobra tapno magun-odmo ti tarigagaymo.

mannurattayo amin. respetarentayo koma ti sagrado nga opisina ni apo mannurat a kaawatan nga impasdekna iti panagbalinna nga “adipen dagiti balikas.” no saan a kastoy, awan serserbitayo, awan mamati kadagiti isursurattayo.

Peter La Julian

Kinuna pay ni Apo Julian:  …. no maipapan iti chair ti aniaman a pasalip, awan koma ti manokenna.  sa la agbutos no adda patas a butos dagiti agbalubal.

 

Daytoy met ti insurat ni Apo Leonardo Belen idi Abril 4:

No pudno ti kunayo iti e-mail a sukatsukatanda dagiti regulasyon iti pannakapili ti Pedro Bucaneg Awardee tapno mapangabakda ti manmanokenda, that is a sacriligious act against the honor of Pedro Bucaneg! And those people involved do not deserve any minute further to be officers of GUMIL FILIPINAS! Officers of GUMIL FILIPINAS should be above suspicion of any shenanigan. No mansaan da ti naganda, dida koma nga iramraman a mansaan ti kintan-ok ni Pedro Bucaneg!
 
Toy nanumo unay,
 
LEONARDO Q. BELEN
Movie/TV Director/Scriptwriter
(Former member of the Board of Directors, IBC 13)
(2nd President of GUMIL FILIPINAS)

Kinuna pay ni Apo Belen:  . . . GUMIL must not be used to promote the personal and vested interest of any member, especially when that person is an officer. GUMIL must be used to promote a collective and dynamic goal -which is to enrich Ilocano literature and arts!

Ti makunak:

Kadagiti appo a nanginominar ken ni Apo Solomon Benitez ken ni Prop. Honor Cabie:

Saan a naisalip dagiti innominaryo.  Sakbay a nalukatan ti nominasionyo, sakbay a nabasa ti naindaklan a gapuananda iti lubong ti literatura Ilokana, patiek a nalpas idin a napili ti pakaitedan ti Pedro Bucaneg Award!

Agtutunostayo koma a mangsupiat kadagiti dakes nga aramid tapno mapasubli ti imnas ken sudi daytoy kadadakkelan a gunglo dagiti mannurat nga Ilokano.

Tapno maipakita ti isusupiatyo iti manipulasion nga inaramid ti Selection Committee ti Pedro Bucaneg, inton maiyukkor dayta balangkantis a medalia, nasayaat no tallikudanyo ti entablado, wenno bilang adda gundawayyo, panawanyo dayta a lugar.  (Saan a mairaman dagiti dadduma a pammadayaw agsipud ta awan pagilasinan a nabaliwbaliwan dagiti pagannurotan, ken saan a kameng ni Precillano Bermudez iti selection committee ti Leona Florentino, ti Pamulinawen Award, ken ti Bannatiran Award.)

Saan a nalaad ti GUMIL Filipinas.  Dagiti rinuker nga opisiales ti mangmangted iti dakes a langa ti GF.  No maikkat dagita rinuker nga opisiales, pumintas ti GUMIL Filipinas!

Inton panagbubutos ti baro nga opisiales, pilinyo koma dagiti napudno nga agtakem.  Ken saanyo nga ipalubos a mamanipular.

Kabsatyo iti pluma,

Ric Agnes

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s