Nana Nora

Standard

Nana Nora ken ti Lagip

 

Iti sagrado a lagip, sadiay nga agbiagka

Iti agnanayon, Nana a Leonora

Sadiay a kadagiti rabii bisitaendaka

Andingayen kakaasim di agpangadua

 

Ngamin ta sika dagiti rugi ti rag-omi

Nana Nora a kadagiti luloken idulinmi

Iti bagi kas iti lasag nga ita ket maasi

Agdawat iti kararag kenka iti panagsubli

 

Iti taeng ti Namarsua sadiayka, di agressat

Sagrapem dagiti amin a bendision ni ayat

Ket iti agnanayon dagiti karkararag

Innakam kadi ibalballaet iti lawag

 

Ti bagi kas iti rasi ni panagam-ammo

Mabilbilang nga oras dagiti kanito

Ta ti gibus dagiti agpaspasugnod a puso

Ket ti pannakabalangat iti trono

 

Anian dagiti a lagip—tumawen itan!

Ti arkos iti ulo rayray ti diamante ti reinam

A sika ti nagbalangat iti korona ti sardam

Sika a Nana Nora ti tallaong a maragsakan.

 

Iti panagsublim iti Namarsua iti biag

Ket ti lagipmi kenka a napnuan anag

Ti palludip a kasingin dagiti arasaas

Nga iti pakabuklan ket pateg awan labas

 

Ta sika Nana Nora dagiti pakabuklan

Pannakikadua a pagkurangan awan man

Ta sika ti ina dagiti sugat iti maysa ken maysa

Nga aglunit kadagiti nasam-it a pamagbaga

 

Kasano ita nga itag-aymi dagiti bagbagi

Ita ta awankan Nana Nora iti sidongmi?

Kasano nga ita ket agbirokkam iti sandi

Dagiti asi a kadakami ket awanan siasi?

 

Panawannakam iti panagpakada a di masinuno

Ngem iti barukong ket ti nakadulin a panagrag-o

Inkan a sumaklang kaikarian a pannakaisalakan

Iti kararagmo kadakami, sadiay ti pakauluan

 

Dios ngarud ti agngina kenka, Nana Nora

Ti Apo a Mannakabalin ti manarabay kenka

Ti silawna ti balonen iti itutundam kenkuana

Ti asi ken panagayatna maragpatmo koma

 

Iti agnanayon a biag dinakam liplipatan

Daldiapenakam iti destino a nailangitan

Ibabaetnakam iti bendision dagiti anghel

Tapno kadagiti aldawmi awan komat’ pagel

 

Dios ti kumuyog kenka, Nanami a Nora

Balonem dagiti lagipmi kenka a sangapada

Iti barukongmi sadiay awan ressat agindegka

Dinto maungaw ti agnanayon a pategmi kenka.

 

Hon/HI

Feb 14/09

 

 

 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s