Bakwit

Standard

Maulit manen ti pakasaritaan.

Iti Mindanao, ken kadagiti aminen a sulinek

ti ili, ken ti kanalbuong a pammigat.

Didigra iti latok kas iti kaldero ken pinggan

bumalay daytoy nga agalinsaed iti panunot

iti panagbalkot kadagiti buteng nga awanan nagan.

Kasano a panawam ti nakaikalian ti kadkadua

nakaisab-itan amin a naipantok nga ar-araw

nga iti maysa nga aldaw ket dumteng ti punsion:

salaan ti apit kas iti panangsala iti ragsak

a makiandingay iti labon.

Ngem ita, ania ti kuna dagiti madistierro

a nakem, dagiti mannalon nga iti langit

agsukay kadagiti pasugnod?

Kasano a binsabinsaem ti sagut a pannakatay

iti ngudo ti paltog? Nasabrak dagiti kanion

ken dusaenda dagiti di nagbasol.

Maintar-intar itatta dagiti essem:

dagiti ubbing iti panagar-arrokattot

iti tagainep a buslon, kas iti padaya

a pangpatalakias iti di katataoan

agapodiosporsanto a kankanayon

a sukal ti mangmangkik nga agapon.

Iti sabali a bangir, matdatayo nga agbuybuya:

adayotayo iti segga dagiti peggad

agsanantektayo a kas pannakipagrikna

iti nakakaasi a biag dagiti kuton a mapadisi.

Saan a bale dagiti tao ta nabayagdan

a bala kadagiti dangadang a naikari.

i

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s